عم متغاظ تأليف محمد عنيبسي حسين

عم متغاظ

تأليف

محمد عنيبسي حسين

أنا متغاظ وهاطق وهتجنن من شوفاني الموضه واللي متتسماش الأفكار العصريه ,, جيت من بلدنا وأنا يعني زي مانتوا عارفين إحنا علي نياتنا طيبين وبنعرف العيب واتربينا كمان علي الكتاب عند سيدنا الشيخ يحفظنا القرآن . أول ماجيت مصريعني اللي بيقولوا عليها قاهرة المعز وقع في إيدي جرنال ياولداه , ولع ولع نفوخي ,وأنا لسه طاظه من بلدنا لاعرف إسود ولا أبيض زي الكتكوت اللي خارج من البيضه ,لقيت فيه شوية نساوين يابووووووووي تقلشي ملط خالص زي الديك السركسي عندينا مالوش كسوه يعني مالوش ريش ,يابووووووووي واحده قاعده واحده نايمه واحده بتقول هوووس ,, ياساتر مافيش خشا والا إيه ودول منين دول من إنهي داهيه واللي حاططها في الجرنال ده والا مجله مش عارفان مخي نفوخي اتلخبط .ماعندوش شويه من الأحمر يخاف علي البنات لما تشوف التصاوير دي تعمل زيها , قلت استفسر يمكن انا خيبان ولا أعرف أفك الخط ,,سألت واحد أفندي كبارا قالي ياعم مالك انت ومال التصاوير دي , سألت شاب كدا باين عليه النعمه بالصلا عالنبي قالي صاحب الجرنال قصدي المجله دي بيمتع الناس بالمناظر الحلوه دي, يمتعوا عنيهم , يعني يحط تصاوير عريانه وتقولي تمتع , قاللي يابني إنت متعرفش حاجه روح اسرح ورا الجاموسه , جاموسه , والله الجاموسه تفهم العيب عن التصاوير دي ,داحنا عندينا في الكفرالواحد مايشوفش مرته إلا يوم الدخله وعيب حتي لو قالها صباح الخير ولو شاف واحده قالعه راسها يستحي ويدور وشه الناحيه التانيه, قالي دي موضه النت , قلتله نت نت ايه ده ويطلع إيه النت ده , إحنا عندينا البتاو البتاو بيعملوه من الدرة يبقي مغذي ومفيد وناكله مع الجبنه القديمه والمش والحلبه الخضرا, لأ يابني آدم النت ده يعني تشوف كل الدنيا وتكلم كل الدنيا وتشوف كل الدنيا , وأشوف الملاليط دول , وتشوف الملاليط , ويشوفوا نساوينا كمان يادي الحوسه ,,أمال فين ياعمي إنت القرآن والأحاديث والربايه والخشا , قالي دي موضه قدمت , إنت إنسان متخلف , متخلف أنا متخلف وأروح ورا الجموسه , طيب والنبي ومين سمي النبي نبي القيم والأصاله والإحترام نابعه من عندينا ,, قال تمودن قال , وأنا متخلف , واسرح ورا الجاموسه , هع يابت الجاموسه ,نفوخي ياولاد ,, والنبي الختا بتاع الجموسه أنضف بكتير من التصاوير دي , عالأقل بينفع في خبيز والا وقيد نولع بيه النار ونبني بيه عشش وله فوايد كتير, لكن التصاوير دي بتولع فين بتولع النفوخ وبعديها بتولع صاحبها واللي شايفها نار جهنم , ويقولولي تمدن ونت وكلام خرابيط ,,, يوووووووووه,,

أنا متخلف تخلف جامد مفهمانشي حاجه أروح احسن ورا الجاموسه واصلي ركعتين تحت السنطه وأعوذ بالله من التمدن والتمتع والخرابيط اللي ولعت نفوخي وقال جاي اشوف قاهره المعز ,, مش هاقول , ,,اهرة المعز ,,بس سايق عليكم النبي متوصفوني بالتخلف لأنكم مش هتجيبوا حاجه جديده ,, أنا متغاظ وهطق , وبوريييييه من الموضه والأفكار العصرية,,

عم متغاظ

تأليف

محمد عنيبسي حسين